Ukraine yatangiye kugaba ibitero mu Burusiya ikoresheje intwaro yikorera ubwayo!

Ibihugu byo mu burengerazuba bw’isi (Uburayi bw’Iburengerazuba n’Amerika ya ruguru) bikomeje guha intwaro Ukraine kugira ngo ishobore gukumira ibitero bya gisilikare igihugu cy’Uburusiya gikomeje kuyigabaho. Ariko, ibyo bihugu byanze guha Ukraine intwaro zikomeye kandi zigezweho zishobora kurasa mu ntera ndende igera ku bilometero 300 kugira ngo Ukraine itazakoresha izo ntwaro mu kugaba ibitero ku butaka bw’igihugu cy’Uburusiya. Ibyo bihugu byo mu burengerazuba bw’isi bifite impungenge ko Ukraine iramutse igabye ibitero k’ Uburusiya, intambara iri hagati y’ibyo bihugu byombi ishobora guhindukamo intambara ya 3 y’isi yose ishobora gukoreshwamo intwaro za kirimbuzi!

Nubwo bimeze gutyo ariko, igihugu cya Ukraine cyashoboye kwikorera ubwacyo intwaro zo mu bwoko bwa drone zifite ubushobozi bwo kugaba igitero ku bilometero 1000!  Igihugu cya Ukraine kikaba cyarakoresheje izo ntwaro (drone) mu bitero cyagabye kuri uyu wa mbere taliki ya 05/12/2022 ku bigo bya gisilikare bibiri biherereye mu Burusiya bikoresha indege kabuhariwe za gisilikare (bombardier stratégiques) mu gutera ibisasu bikomeye kuri Ukraine; izo ndege zitera ibisasu  byo mu bwoko bwa misile (missiles de croisières). Ibigo bya gisilikare Ukraine yagabyeho ibitero ni Diaguilevo na Engels biherereye mu Burusiya rwagati, nko mu birometero 500 kugeza kuri 600 uvuye ku mupaka wayo na Ukraine.

Minisiteri y’ingabo y’Uburusiya ivuga ko intwaro Ukraine yakoresheje mu kugaba ibyo bitero ari izo mu bwoko bwa Drones nshya zikorwa na Ukraine ubwayo ; ingabo z’Uburusiya zikaba zemeza ko zashoboye gusenya izo drone zatewe na Ukraine ariko ibisigazwa byazo bikaba byarateje urupfu rw’abasirikare batatu b’Uburusiya. Kugeza ubu, ingabo za Ukraine nta ntwaro zifite zirasa mu ntera ndende kuburyo zishobora kugera ku buteka bw’Uburusiya, (intwaro za misile Ukraine ihabwa n’Amerika zifite ubushobozi bwo kurasa mu ntera ya kilometero 80 gusa). Isosiyete ikora intwaro yo muri Ukraine yitwa «Ukroboronprom » ikaba yaratangaje mu mpera z’ukwezi k’Ukwakira ko iri hafi gukora intwaro zifite ubushobozi bwo kohereza ibisasu ku ntera ingana n’ibilometero 1000 kandi buri gisasu gitewe kikaba  gipima ibilo 75.

Ubwoko bwa drones zikorwa na Ukraine

Icyo gihe ikigo gikora intwaro cya Ukraine, cyatanze ubutumwa kuri facebook aho kigira kiti: «Ukroboronprom yatangiye gukora mu buryo bunoze kuva igihugu cy’Uburusiya cyatangira kugaba ibitero bikomeye kuri Ukraine». Mu kugeza ubutumwa kuri Perezida Putini w’Uburusiya, Ukroboronprom yagize iti : «Barakubeshye bakubwira ko nta bushobozi Ukraine ifite, ko idashobora guhangana n’ingabo uyoboye, ibyo bakubwiye ni ukuri, byabaye ngombwa ko dusaba inkunga inshuti n’abavandimwe, ariko kandi ibyo bikaba byaraduhaye umwanya wo gukora cyane aho kwirirwa mu magambo, kugirango dushobore kubona ubushobozi butuvuyemo bwo guhangana nawe, rindira gato ntakirakorwa, ugiye kutubona» !

Mu gitondo cyo kuri uyu wa kabiri taliki ya 6/12/2022, ingabo za Ukraine zagabye igitero ku kibuga cy’indege kiri mu ntara ya Koursk iherereye mu Burusiya, iyo ntara ikaba ihana umupaka n’igihugu cya Ukraine mu gace kagenzurwa n’Uburusiya. Umuyobozi w’intara ya Koursk yemeza ko ibigega bya peteroli biri hafi y’ikibuga cy’indege cya Koursk aribyo ibitero by’ingabo za Ukraine byibasiye kuburyo byahise bifatwa n’inkongi y’umuriro. Icyo gitero cya Ukraine cyo kuri uyu wa kabiri nta muntu cyahitanye uramenyekana uretse ibintu byinshi byangiritse. Uburusiya bukaba bukomeje kurega leta  ya Ukraine kugaba ibitero ku butaka bwayo, bityo umutekano wayo ukaba ubangamiwe.

Nyuma ya Taïwan, igihugu cya Ukraine ni icya kabiri mu gukora ibyuma bikoreshwa mu ikoranabuhanga ( puces électroniques), ku buryo Ukraine ifite ubushobozi bwo gukora intwaro zigezweho ndetse n’iza kirimbuzi.  Abahanga mu byagisilikare bo mu bihugu by’iburengerazuba , bemeza ko izi ntwaro nshya za Ukraine zifite ubushobozi bwo kwangiza ibintu byinshi; ibyo bikaba byiyongera ku ntwaro zikomeye yahawe n’ibihugu byo mu burengerazuba bw’isi zishanyaguza ibisasu (missiles) biterwa n’igihugu cy’Uburusiya. Ikibazo abantu benshi bakomeje kwibaza ni ukumenya uko Uburusiya buzitwara niba Ukraine ishoboye gukora intwaro zikomeye ikoresha mukuyigabaho igitero ; ese Uburusiya bushobora gutangiza intambara ya 3 y’isi yose ? Inzira y’amahoro hagati y’ibi bihugu byombi iracyari kure nk’ukwezi kandi isi yose ikomeje guhura n’ingaruka zikomeye ziterwa nayo! Ni ukubitega amaso.

Veritasinfo.