USA : Ibyemezo bya mbere perezida Joe Biden yashyizeho umukono akimara kurahira kuba Perezida.

Kuri uyu wa gatatu taliki ya 20/01/2021, nibwo perezida mushya uherutse gutorwa wa Leta Zunze Ubumwe z’Amerika Joe Biden yarahiriye imirimo yo kuba perezida w’icyo gihugu muri manda y’imyaka 4. Akimara kurahira, Joe Biden yashyize umukono ku mategeko menshi avuguruza amategeko yari yarashyizweho n’uwo asimbuye kuri uwo mwanya Donald Trump.

Itegeko rya mbere Joe Biden yashyizeho umukono ryerekeranye no gukuraho itegeko ryashyizweho na Trump ryabuzaga abaturage bakomoka mu bihugu bigwiriyemo idini rya Islamu kimwe n’ibihugu by’Afurika kwinjira ku butaka bw’Amerika (USA). Biden kandi yashyize umukono ku itegeko rihagarika amafaranga yari ateganyijwe yo kubaka urukuta ku mupaka uhuje Amerika n’igihugu cya Mexique muri gahunda yo gukumira impunzi ziva mu bihugu biri ku mugabane w’Amerika y’amajyepfo zihungira muri Leta Zunze Ubumwe z’Amerka, ndetse Biden akaba yahise ashyiraho itegeko ryo kurengera impunzi zageze muri icyo gihugu zitaragera ku myaka y’ubukure.

Umujyanama wa Perezida Joe Biden ariwe Jake Sullivan yabwiye itangazamakuru ko amategeko yashyizweho na Trump yasuzuguje Amerika cyane kuko yari agamije kuvangura abantu ashingiye ku myemerere yabo no gukumira abanyamahanga. Biden kandi yashyize umukono ku itegeko risubiza Amerika mu masezerano y’i Paris mu Bufaransa yo kurengera ibidukikije n’ihindagurika ry’ikirere kimwe n’itegeko risubiza Amerika mu mwanya yahoranye wo kuba umunyamuryango w’ishyirahamwe mpuzamahanga ryita ku buzima ku isi OMS. Biden yasabye abagize leta ye kugaragaza amategeko yose yashyizweho na Trump ashingiye ku ivangura ry’uruhu kimwe n’akumira abanyamahanga agakurwaho.

Biteganyijwe ko Biden yiteguye gushyiraho amategeko yo gufasha abahuye n’icyorezo cya Covid-19 kandi akaba yiteguye gushyira umukono ku mategeko 10 yihutirwa akoresheje itegeko-teka rya perezida atiriwe anyuza ayo mategeko mu nteko ishingamategeko nk’uko itegeko nshinga ry’Amerika ribimuhera ububasha. Kurahira kwa Perezida Joe Biden no gutangira imirimo ye vuba byagaruriye ikizere n’ishema abanyamerika bari batangiye kugira ibibazo by’uko iryo rahira rishobora kutaba bitewe n’imvururu batinyaga ko zishobora guterwa n’abashyigikiye Trump.

Harakabaho Demokarasi no gusimburana ku butegetsi binyuze mu mahoro.

Veritasinfo.

Veritas

One Comment

Leave a Reply