USA-Rwanda: Antony Blinken avugako afite inshingano nyamukuru y’uko Paul Rusesabagina afungurwa agasubira muri Amerika!

Antony Blinken yageze i Kinshasa

Kuri uyu wa kabiri taliki ya 9/08/2022, Umunyamabanga wa leta ushinzwe ububanyi n’amahanga w’igihugu cya Leta Zunze Ubumwe z’Amerika (USA) Bwana Antony Blinken nibwo yageze i Kinshasa mu murwa mukuru w’igihugu cya Repubulika Iharanira Demokarasi ya Congo (RDC). Mu masaha ya nyuma ya saa sita akaba aribwo ari bugirane ibiganiro na Perezida wa RDC  Bwana Félix Tshisekedi. Biteganyijwe ko uruzinduko rwa Bwana Antony Blinken muri Congo ruzamara iminsi ibiri, akazava muri icyo gihugu yerekeza i Kigali mu Rwanda. Bwana Blinken ageze i Kinshasa avuye muri Afurika y’epfo.

Mu rugendo arimo muri ibi bihugu uko ari bitatu, Antony Blinken avuga ko agirana ibiganiro n’abayobozi b’ibyo bihugu ku byerekeranye n’umubano w’ibihugu by’Afurika na Leta zunze Ubumwe z’Amerika. Blinken akaba avugako umubano w’ibihugu by’Afurika n’Amerika ugomba gushingira kubwubahane kuburyo ntawumva ari hejuru y’undi. Ibiro by’umukuru w’igihugu cya  Repubulika Iharanira Demokarasi ya Congo byatangaje ko  ibiganiro biragirana na Antony Blinken  biribanda ku kibazo cy’umutwe wa M23 uteza umutekano muri Congo n’inkunga uwo mutwe uhabwa na Leta ya Kigali.

Leta ya Congo ikaba iri busabe Bwana Antony Blinken ko leta Zunze ubumwe z’Amerika zigomba gushyira umutwe wa M23 ku rutonde rw’icyo gihugu rw’imitwe y’iterabwoba nk’uko byakozwe ku mutwe w’ADF. Congo ikaba kandi isaba Amerika ko yabona uburenganzira bwo kugura intwaro ishatse itagombye kubitangira raporo. Imiryango itegamiye kuri leta muri Congo kimwe na leta y’icyo gihugu bikaba byatangaje ko biri busabe Bwana Antony Blinken gushyira igitutu kuri leta y’u Rwanda kugirango ikure abasilikare bayo ku butaka bwa Congo kandi Amerika igafatira u Rwanda ibihano.

Mu kiganiro kirambuye Bwana Antony Blinken yagiranye n’umunyamakuru wa radiyo mpuzamahanga y’Abafaransa RFi mu rurimi rw’igifaransa yasubije ibibazo byinshi bijyanye n’uruzindiko arimo mu bihugu by’Afurika y’epfo, Repubulika Iharanira Demokarasi ya Congo n’u Rwanda. Ku kibazo cya M23, Antony Blinken yavuze ko azakiganiraho ku buryo burambuye na Congo ndetse n’u Rwanda, naho kubyerekeranye no gufatira u Rwanda ibihano yavuze ko atekerezako mbere na mbere hagomba kwitabazwa inzira y’ububanyi n’amahanga mugushaka umuti urambye wo kugarura amahoro mu burasirazuba bwa Congo.

Icyo kibazo cy’umutekano wa Congo, Blinken akaba yarakigaririyeho na perezida w’Afurika y’epfo maze basanga byaba byiza ko habanza kwitabazwa umuryango wa SADC ndetse n’ibiganiro by’i Nairobi biyobowe na perezida wa Kenya Bwana Uhuru Kenyata. Umunyamakuru wa RFI yabajije Bwana Blinken ku kibazo cya Bwana Paul Rusesabagina ufungiye mu Rwanda niba ikibazo cye azakiganiraho na Kagame akamusaba kumufungura, Antony Blinken yamusubije muri aya magambo , yagize ati:

«Niko bimeze, uko biri kose, mu bihugu bitari bicye ku isi , hari Abanyamerika n’abafite uburenganzira bwo gutura muri Amerika (résidents américains) babifungiwemo mu buryo bw’akarengane. Kuri njye, inshingano nyamukuru mfite ni uko Paul Rusesabagina agomba gufungurwa agasubira mu rugo rwe ruri muri Leta Zunze Ubumwe z’Amerika.»

Dutegereje kureba uko Paul Kagame azabyitwaramo. Ese azavunira ibiti mu matwi asuzugure Abanyamerika akomeze gufunga Paul Rusesabagina cyangwa se azashyira ku munzani ingaruka n’inyungu azakuramo maze amurekure? Igisubizo tuzakibona mu minsi iri imbere.

Mushobora kumva ikiganiro cyose Bwana Antony Blinken yagiranye n’umunyamakuru wa RFI mu rurimi rw’igifaransa (fungura amajwi hasi aha):

Veritasinfo.